పండుగలా జరుపుకుందాం అంబేద్కర్ జయంతి – పిలుపునిచ్చిన పాలకుర్తి తిరుపతి

పిసిడబ్ల్యూ న్యూస్ ప్రత్యేక ప్రతినిధి: హనుమకొండ జిల్లా పరకాల పట్టణంలో భారత రాజ్యాంగ శిల్పి డా. బి.ఆర్. అంబేద్కర్ జయంతి వేడుకలు ఘనంగా నిర్వహించేందుకు స్థానికులు సిద్ధమవుతున్నారు. ప్రతి సంవత్సరం మాదిరిగానే ఈసారి కూడా అంబేద్కర్ ఆశయాలను స్మరించుకుంటూ దేశవ్యాప్తంగా బడుగు, బలహీన వర్గాలు, సామాజిక కార్యకర్తలు, మేధావులు ఈ జయంతిని పండుగలా జరుపుకునేందుకు ముందుకు వస్తున్నారు. ఈ నేపథ్యంలో పరకాల పట్టణానికి చెందిన సామాజిక కార్యకర్త, బిజెపి పరకాల పట్టణ ప్రధాన కార్యదర్శి పాలకుర్తి తిరుపతి చిన్నప్పటి నుంచే అంబేద్కర్ భావజాలంపై ఆకర్షితుడై, ఆయన ఆశయాలను ప్రజల్లోకి తీసుకెళ్లేందుకు కృషి చేస్తున్నారు. సమానత్వం, సామాజిక న్యాయం, విద్యా ప్రాముఖ్యత వంటి అంబేద్కర్ సూచించిన విలువలను తన వంతుగా ప్రజలకు తెలియజేస్తూ ఆయన నిరంతరం సేవలందిస్తున్నారు సోమవారం రోజు పరకాల పట్టణంలోని అంబేద్కర్ విగ్రహాన్ని స్వయంగా శుభ్రం చేసి, అలంకరించడం ద్వారా తిరుపతి తన గౌరవాన్ని చాటుకున్నారు. విగ్రహాన్ని శుభ్రపరచడమే కాకుండా, పరిసర ప్రాంతాన్ని కూడా పరిశుభ్రంగా ఉంచాలని ప్రజలకు సూచించారు.ఈ సందర్భంగా తిరుపతి మాట్లాడుతూ, “అంబేద్కర్ ఆశయాలు కేవలం ఒక వర్గానికి మాత్రమే కాకుండా సమాజంలోని ప్రతి ఒక్కరికీ మార్గదర్శకం. ఆయన చూపించిన దారిలో నడిస్తేనే సమాజం అభివృద్ధి చెందుతుంది. అందుకే ప్రతి ఒక్కరూ అంబేద్కర్ జయంతిని పండుగలా జరుపుకోవాలి” అని పిలుపునిచ్చారు. అలాగే యువత అంబేద్కర్ జీవితం, ఆయన పోరాటం గురించి తెలుసుకుని, సమాజంలో మార్పు తీసుకురావడానికి ముందుకు రావాలని సూచించారు. విద్య, హక్కులు, సమానత్వం అనే మూడు మూల సూత్రాలను జీవితంలో ఆచరించాలని ఆయన పేర్కొన్నారు. పరకాల పట్టణంలో అంబేద్కర్ జయంతి సందర్భంగా పూలమాలలు అర్పించడం, ర్యాలీలు, సభలు నిర్వహించడం వంటి కార్యక్రమాలు చేపట్టేందుకు స్థానిక సంఘాలు ఏర్పాట్లు చేస్తున్నాయి. ప్రజలు పెద్ద సంఖ్యలో పాల్గొని అంబేద్కర్‌కు నివాళులు అర్పించాలని నిర్వాహకులు కోరుతున్నారు.ఈ విధంగా అంబేద్కర్ జయంతి పర్వదినం సమాజంలో ఐక్యత, చైతన్యం, సమానత్వానికి ప్రతీకగా నిలుస్తుందని స్థానికులు భావిస్తున్నారు.