కళతప్పిన పరకాల పశువుల సంత – ఐదేళ్లలో పూర్తిగా క్షీణించిన అంగడి వైభవం

పరకాల పట్టణంలో ఒకప్పుడు వారానికి ఒక్కసారి జరిగే పశువుల సంత ఉమ్మడి వరంగల్ జిల్లాలో పేరుగాంచిన అంగడిగా నిలిచింది. చుట్టుపక్కల మండలాలు, గ్రామాల నుంచే కాకుండా దూర ప్రాంతాల రైతులు సైతం భారీ ఎత్తున పరకాలకు చేరుకుని తమ పశువులను కొనుగోలు–అమ్మకాలు జరిపేవారు. మేకలు, గొర్రెలు, ఆవులు, ఎద్దులు వంటి పశువులతో అంగడి ప్రాంగణం కిటకిటలాడేది. ఉదయం నుంచే వ్యాపారుల హోరాహోరీ బేరసారాలు, రైతుల సందడి, పశువుల కేకలతో ఆ ప్రదేశం కళకళలాడేది. అయితే గత ఐదేళ్లుగా ఈ సంత క్రమంగా క్షీణిస్తోంది. ముందుగా వ్యాపారుల సంఖ్య తగ్గగా, తరువాత కొనుగోలుదారులు కూడా రావడం తగ్గిపోయింది. రవాణా సౌకర్యాల లోపం, సరైన మౌలిక వసతుల కొరత, పశువులకు తాగునీరు–నీడ వంటి ఏర్పాట్లు లేకపోవడం, పారిశుధ్య సమస్యలు వంటి అంశాలు దీనికి ప్రధాన కారణాలుగా చెబుతున్నారు. అంతేకాకుండా పక్క ప్రాంతాల్లో కొత్త సంతలు ప్రారంభం కావడం, కొందరు రైతులు నేరుగా ఫారంల నుంచే కొనుగోళ్లు చేయడం కూడా ప్రభావం చూపిందని వ్యాపారులు పేర్కొంటున్నారు.ఒకప్పుడు పశువుల సంత రోజున పరకాల పట్టణంలో చిన్నచిన్న వ్యాపారాలు కూడా లాభాలు పొందేవి. టీ దుకాణాలు, హోటళ్లు, గడ్డి విక్రేతలు, రవాణా వాహనదారులు అందరూ ఈ అంగడిపై ఆధారపడేవారు. ఇప్పుడు ఆ సందడి పూర్తిగా కనుమరుగై, అంగడి ప్రాంగణం వెలవెలబోతుంది. స్థానిక రైతులు, వ్యాపారులు సంత పునరుద్ధరణకు సంబంధిత అధికారులు చర్యలు తీసుకోవాలని కోరుతున్నారు. కనీస సౌకర్యాలు కల్పించి, ప్రచారం నిర్వహించి, భద్రతా ఏర్పాట్లు చేయగలిగితే పరకాల పశువుల సంత మళ్లీ పాత వైభవాన్ని సంతరించుకుంటుందని వారు ఆశాభావం వ్యక్తం చేస్తున్నారు. పట్టణ ఆర్థిక వ్యవస్థకు ఒకప్పుడు ఊతమిచ్చిన ఈ అంగడి మళ్లీ కళతిరిగి నిలవాలంటే తక్షణ చర్యలు అవసరమనే అభిప్రాయం వ్యక్తమవుతోంది.