హుజూరాబాద్ రోడ్డులో ట్రాఫిక్ అస్తవ్యస్తం.. వైన్ షాప్ ముందే సమస్య

పరకాల: పట్టణంలోని హుజూరాబాద్ రోడ్డులో ఉన్న ఓ వైన్ షాప్ ముందు టూ వీలర్లను విచ్చలవిడిగా నడిరోడ్డుపైనే పార్కింగ్ చేయడం తీవ్ర ఆందోళనకు గురిచేస్తోంది. మద్యం కొనుగోలు కోసం వచ్చే వినియోగదారులు తమ ద్విచక్ర వాహనాలను రహదారిపైనే నిలిపివేస్తుండటంతో వాహన రాకపోకలకు తీవ్ర అంతరాయం ఏర్పడుతోంది. ముఖ్యంగా అదే మార్గంలో నిత్యం రాకపోకలు సాగించే ఆర్టీసీ బస్సులు, ఇతర భారీ వాహనాలు ఇబ్బందులు ఎదుర్కొంటున్నాయని స్థానికులు వాపోతున్నారు. రోడ్డుపై అస్తవ్యస్తంగా నిలిపిన టూ వీలర్ల కారణంగా ఎదురెదురుగా వచ్చే వాహనాలు ఒకదానికొకటి దారి ఇచ్చుకునే పరిస్థితి లేక ట్రాఫిక్ సమస్యలు తలెత్తుతున్నాయి. పాదచారులు, మహిళలు, వృద్ధులు, విద్యార్థులు రహదారి దాటేందుకు సైతం ఇబ్బందులు పడుతున్నారని స్థానికులు చెబుతున్నారు. ఏ క్షణమైనా ప్రమాదం జరిగే పరిస్థితులు నెలకొన్నాయని ఆందోళన వ్యక్తం చేస్తున్నారు. అంతేకాకుండా వైన్ షాప్‌కు సమీపంలో ఉన్న ఆగ్రో ఏజెన్సీ వద్దకు వచ్చే వినియోగదారులు, రైతులు కూడా వాహనాలను నిలిపేందుకు ఇబ్బందులు ఎదుర్కొంటున్నారని సమాచారం. రోడ్డుపై పార్క్ చేసిన వాహనాల కారణంగా ఆ సంస్థ కార్యకలాపాలపైనా ప్రతికూల ప్రభావం పడుతోందని స్థానిక వ్యాపారులు పేర్కొంటున్నారు. ట్రాఫిక్ నిబంధనలను ఉల్లంఘిస్తూ రహదారిపైనే వాహనాలు నిలిపివేస్తున్నప్పటికీ సంబంధిత అధికారులు, ట్రాఫిక్ పోలీసులు ఇప్పటివరకు సమర్థవంతమైన చర్యలు తీసుకోలేదని స్థానికులు విమర్శిస్తున్నారు. వైన్ షాప్ వద్ద ప్రత్యేక పార్కింగ్ ఏర్పాటు చేయించడం, రహదారిపై అక్రమంగా పార్క్ చేసిన వాహనాలను తొలగించడం, నిబంధనలు ఉల్లంఘించిన వారిపై జరిమానాలు విధించడం వంటి చర్యలు వెంటనే చేపట్టాలని వారు డిమాండ్ చేస్తున్నారు. ప్రమాదం జరిగిన తర్వాత స్పందించడం కంటే ముందస్తు చర్యలు తీసుకోవడం ఎంతో అవసరమని, ప్రజల ప్రాణ భద్రత దృష్ట్యా సంబంధిత అధికారులు తక్షణమే స్పందించి సమస్యకు శాశ్వత పరిష్కారం చూపాలని స్థానిక ప్రజలు కోరుతున్నారు.