పరకాలలో మహాత్మా గాంధీ విగ్రహం ఏర్పాటు చేయాలి. గాంధీ జయంతి నాటికి కాంగ్రెస్ ప్రభుత్వం నిర్ణయం తీసుకోవాలని డిమాండ్

పి.సి.డబ్ల్యూ న్యూస్ ప్రత్యేక ప్రతినిధి: పరకాల దేశానికి స్వాతంత్ర్యం సాధించి పెట్టిన జాతిపిత మహాత్మా గాంధీ ఆశయాలు నేటి తరాలకు చేరవేయాలంటే ఆయన స్ఫూర్తిని ప్రతిబింబించే విధంగా ప్రజా ప్రదేశాల్లో గాంధీ విగ్రహాలను ఏర్పాటు చేయాల్సిన అవసరం ఉందని కాంగ్రెస్ పార్టీ సీనియర్ నాయకులు, కార్యకర్తలు, అభిమానులు అభిప్రాయపడుతున్నారు. తెలంగాణ రాష్ట్రంలో కాంగ్రెస్ ప్రభుత్వం అధికారంలోకి వచ్చిన నేపథ్యంలో గాంధీ జయంతి సందర్భంగా రాష్ట్ర వ్యాప్తంగా ప్రతి జిల్లా, ప్రతి నియోజకవర్గ కేంద్రంలో లేనిచో మహాత్మా గాంధీ విగ్రహాలను ఏర్పాటు చేయాలని వారు డిమాండ్ చేస్తున్నారు. ప్రత్యేకంగా పరకాల పట్టణంలో ఇప్పటి వరకు మహాత్మా గాంధీకి తగిన స్థాయిలో గుర్తింపు కల్పించే విధంగా విగ్రహం లేకపోవడం బాధాకరమని పలువురు ప్రజాసంఘాల నాయకులు పేర్కొంటున్నారు. స్వాతంత్ర్య ఉద్యమానికి నాయకత్వం వహించి అహింసా మార్గంలో ప్రపంచానికి ఆదర్శంగా నిలిచిన మహాత్మా గాంధీ సేవలను నేటి యువతకు తెలియజేయడం ప్రభుత్వాల బాధ్యత అని వారు పేర్కొన్నారు. రాష్ట్రంలో అనేక ప్రాంతాల్లో మహాత్మా గాంధీ విగ్రహాలు నిర్లక్ష్యానికి గురవుతున్నాయని, కొన్ని చోట్ల కనుమరుగయ్యాయని, మరికొన్ని ప్రాంతాల్లో నిర్వహణ లేక దెబ్బతిన్నాయని ఆందోళన వ్యక్తం చేస్తున్నారు. గాంధీ పేరు చెప్పుకుంటూ రాజకీయాలు చేసే నాయకులు ఆయన సిద్ధాంతాలను ఆచరణలో చూపించాల్సిన అవసరం ఉందని పేర్కొన్నారు. కేవలం జయంతి, వర్ధంతి రోజుల్లో పూలమాలలు వేసి నివాళులు అర్పించడం సరిపోదని, శాశ్వత గుర్తింపుగా విగ్రహాలు, స్మారక స్థూపాలు ఏర్పాటు చేయాలని కోరుతున్నారు. పరకాల పట్టణం చారిత్రక ప్రాధాన్యత కలిగిన ప్రాంతమని, తెలంగాణ ఉద్యమం సహా అనేక ప్రజా ఉద్యమాలకు వేదికగా నిలిచిందని గుర్తు చేస్తున్నారు. అలాంటి పట్టణంలో జాతిపిత మహాత్మా గాంధీ విగ్రహం ఏర్పాటు చేయడం ద్వారా ప్రజల్లో దేశభక్తి, సామాజిక బాధ్యత, అహింసా భావజాలం మరింత బలోపేతం అవుతుందని అభిప్రాయపడుతున్నారు. రాబోయే అక్టోబర్ 2 గాంధీ జయంతి నాటికి పరకాల పట్టణంలో ప్రధాన కూడలిలో మహాత్మా గాంధీ విగ్రహాన్ని ప్రతిష్ఠించి, దానిని ప్రజలకు అంకితం చేయాలని కాంగ్రెస్ ప్రభుత్వం, స్థానిక ప్రజాప్రతినిధులు, మున్సిపల్ అధికారులు, ప్రజా సంఘాలు సమిష్టిగా ముందుకు రావాలని కోరుతున్నారు. గాంధీ ఆశయాలను గౌరవిస్తామని చెప్పే ప్రతి ఒక్కరూ ఈ అంశంపై చొరవ చూపాలని విజ్ఞప్తి చేస్తున్నారు. మహాత్మా గాంధీ విగ్రహం ఏర్పాటు అనేది కేవలం ఒక విగ్రహ స్థాపన మాత్రమే కాదని, అది భారత రాజ్యాంగ విలువలకు, అహింసా సిద్ధాంతానికి, జాతీయ సమైక్యతకు ప్రతీకగా నిలుస్తుందని కాంగ్రెస్ శ్రేణులు పేర్కొంటున్నాయి. గాంధీ జయంతి సందర్భంగా పరకాలలో విగ్రహం ఏర్పాటు చేసి జాతిపితకు నిజమైన నివాళి అర్పించాలని ప్రజలు కోరుతున్నారు.