పరకాల మున్సిపాలిటీలో సాధారణ సర్వసభ్య సమావేశం.. ఆరు అంశాలకు ఏకగ్రీవ ఆమోదం

పరకాల, సెప్టెంబర్ 29 (పిసిడబ్ల్యూ న్యూస్): పరకాల మున్సిపాలిటీ కార్యాలయంలో మున్సిపల్ చైర్మన్ పావుశెట్టి సునీల్ కుమార్ అధ్యక్షతన మంగళవారం సాధారణ సర్వసభ్య సమావేశం నిర్వహించారు. సమావేశానికి హనుమకొండ జిల్లా అదనపు కలెక్టర్ బి. శేషాద్రి, డిప్యూటీ కలెక్టర్ టి. రోహిత్, మున్సిపల్ కమిషనర్ పోతరాజు పవన్, వైస్ చైర్‌పర్సన్, వార్డు కౌన్సిలర్లు, మున్సిపల్ అధికారులు, సిబ్బంది హాజరయ్యారు. సమావేశంలో మున్సిపాలిటీకి సంబంధించిన ఆరు కీలక అంశాలను కౌన్సిల్ ముందుకు తీసుకురాగా, సభ్యులు ఆయా అంశాలపై సమగ్రంగా చర్చించారు. అనంతరం కౌన్సిల్ సభ్యుల సమ్మతితో ఆరు అంశాలకు ఏకగ్రీవంగా ఆమోదం తెలిపారు. పట్టణంలో ప్రజలకు మెరుగైన మౌలిక వసతులు కల్పించడం, పారిశుధ్య నిర్వహణను పటిష్టం చేయడం, పట్టణ అభివృద్ధి పనులను వేగవంతం చేయడం, ప్రజలకు మెరుగైన పౌర సేవలు అందించడం వంటి అంశాలపై సమావేశంలో చర్చించారు. పట్టణ అభివృద్ధికి సంబంధించిన కార్యక్రమాలను ప్రజాప్రతినిధులు, అధికారులు సమన్వయంతో ముందుకు తీసుకెళ్లాలని నిర్ణయించారు. ప్రజల అవసరాలకు అనుగుణంగా మున్సిపాలిటీ పరిధిలో అభివృద్ధి కార్యక్రమాలను చేపట్టేందుకు ప్రాధాన్యత ఇవ్వనున్నట్లు చైర్మన్ పావుశెట్టి సునీల్ కుమార్ తెలిపారు. ప్రజలకు అవసరమైన మౌలిక సదుపాయాలు, పారిశుధ్యం, పౌర సేవల విషయంలో ఎలాంటి నిర్లక్ష్యానికి తావులేకుండా అధికారులు, సిబ్బంది సమన్వయంతో పనిచేయాలని సమావేశంలో సూచించారు.